sábado, 27 de julho de 2013

Governador Oscar Ruas ho Liurai Funar

Ha’u-nia abo (pai nia pai) konta hanesan ne’e. Gobernador  nalui ti uamak tuan D. Cruz (Governador husu ba ha’u-nia abo. Nota: Umak tuan katak ha’u-nia abo): oh D. Cruz hakarak han manu tomak ka manu sorin. Dom Cruz hatan ha’u hakarak han manu sorin. Entaun malae gubernur fera fahe de’it reinu Funar. Se D. Cruz hatan katak nia hakarak han manu tomak entaun malae harahun total tiha Funar. Rai Funar atu halakon total tiha de’it.  Ne’e akontese depois de segunda guerra mundial. Karik tanba reinu Funar dezde tempu uluk nanis la hakruuk ba malae sira no halo revolta pelo menus tuir Livro Professor Rene Pélisser A Guerra em Timor revolta iha Funar akontese dalarua iha 1905 no 1907.

Uluk ha'u hanoin funu rua ne'e ida lidera husi Dom João da Cruz no ida seluk lidera husi Na'i Suan, Dom Jose do Espírito Santo nia pai. Afinal ha'u sala bainhira ha'u lee fali Amu D. Carlos nia livru ho título os Reinos Antigos em Timor-Leste. 

Hanesan  iha Amu Dom Carlos nia livru Os Antigos Reinos de Timor-Leste hateten katak liutiha segunda guerra mundial iha liurai balu hetan kastigu ba Ataúro ida maka Liurai husi Funar (Páj 46). Informasaun ne'e iha Amu Bispu D. Carlos ninia livru ha'u mós la hatene informasaun Amu D. Carlos hetan husi ne'ebé no informasaun ne'e loos ka lae. Buat ida interessante mai ha'u maka abo no tio José Osório Soares hola Gubernur Oscar Ruas nia oan feto maka tia Mariazinha halo Istória ne'e sai interessante tebes. Tanba tuir família sira konta ha’u-nia beiala ida husi Funar úniku ne’ebé hetan kastigu iha Ataúro maka D. João da Cruz. 

Lee livru Amu Dom Carlos nian halo ha’u hanoin keta ne’e karik relasiona ba D. João da Cruz? 

Se ne’e loos duni karik entaun Istória ne’e interessante tebes. Tanba depois segunda guerra mundial gubernur Timor-Português maka Oscar Ruas. Tuir lista ne’ebé ha’u lee iha Amu D. Carlos nia livru ne’e. Entaun KARIK nia maka kastigu beiala D. João da Cruz (uma lisan Liurai Manehi'ak) karik loos entaun afinal D. João da Cruz sei iha relasaun familiar ho abo ou tio José Osório Soares ne'ebé nu'udar ran husi D. Dinis Malietar (uma lisan Liurai Manelima) tanba D. Dinis hola D. João da Cruz ninia prima naran abo Dauk.

Ha'u-nia abo nia abo (ha'u-nia pai ninia bisevô) Na'i Mauk (Dato ne'ebé kaer rota Parlamentu) hola D. João da Cruz ninia feton naran Kasabutar. Na'i Mauk ho Kasabutar ninia oan mane naran Dato Jerimias hola Filomena Naenahak jerasaun liurai Manelima (Tio Ikito Osorio Soares nia tian no bele konfirma ho tio Ikito Osorio Soares). Dato Jerimias ho Filomena sira-nia oan feto Eugenia hola abo Carlos Soares ne'ebé kaer rota Liurai Manelima. Abo Carlos nia oan mane tio Francisco hola ha'u-nia pai nia feton tia Fernanda(matebian ona). Kona-ba ha’u-nia ran husi Liurai Manelima maluk ne’ebé maka hatene liu maka tio Ikito Osório Soares, tio Siku Soares (pai nia primo ao mesmo tempo pai nia rian) ho tio Estêvão Soares.

Iha partidu 1975 nian jerasaun D. Dinis halo parte ba Apodeti(abo no tio José Osório Soares) no jerasaun D. João da Cruz (Abo Domingos Sarmento Baptista, ha’u-nia mãe nia pai boot. Agora ha’u-nia mãe ninia maun-boot tio Belchior maka representa iha Funar) ho jerasaun Na'i Mauk (ha’u-nia abo, pai nia pai. Agora ha’u-nia pai nia alin pai Dinis maka representa iha Funar) halo parte ba Fretilin. No jerasaun husi ha’u-nia mãe nia mãe nian maka UDT. Ha’u-nia mãe nia mãe nia pai maka D. José do Espírito Santo. Katak husi lado materno ha’u-nia mãe beiaoan husi D. José do Espírito Santo.

Buat ida interessante mai ha’u maka se loos karik governador Oscar Ruas maka kastigu D. João da Cruz iha Atauro entaun abo no tio José Osório Soares kaben ho Governador Oscar Ruas ninia oan feto entaun Istória ne’e intessante tebes. Tanba uma Lisan Liurai Manehi’ak, Uma Lisan Dato Bamatak, Uma Lisan Liurai Maneka’olik ho Uma Lisan Liurai Manelima iha relasaun familiar tanba família sira hola malu ba mai hela de’it. 

Maibé ha’u-nia intensaun liu-liu maka karik loos Governador Oscar Ruas maka kastigu D. João da Cruz entaun karik mós ninia jerasaun sira balu hatene ou rai hela karik informasaun ruma konabá D. João da Cruz. 

Informasaun sira ne’e importante karik atu hatene no liu-liu ha’u hanoin keta hatene hela mos konaba rate D. João da Cruz nian iha Atauro. Se maka hatene D. João da Cruz keta iha karik jerasaun ruma iha ne’ebá. 
Ne’e hanesan possibilidade de’it. 

Ha’u ko’alia hanesan ne’e la’ós atu akuza passado. Passadu ho ninia sirkunstánsia rasik. Loos ka loos passado liu tiha ona. La vale buat ida ita akuza ida ne’e ou ida ne’ebá. Buat hotu-hotu liu tiha ona. Importante ita aprende husi passado lori fó vantajen ba prezente. Buat ne’ebé passado di’ak ou aat liu tiha ona. Ha’u hakerek hanesan lori respeita ha’u-nia família sira hotu husi Uma Lisan Liurai Manehi’ak, Uma Lisan Liurai Maneka’olik, Uma Lisan Liurai Manelima ho Uma Lisan Dato Bamatak. 

Ha’u sei nunka nega nem ba dala ida iha ha’u-nia moris tia Mariazinha ninia ajuda sira hotu ne’ebé maka nia halo ba ha’u-nia pai. Tia Mariazinha ninia favor sira hotu ha’u sei selu la bele. Família loloos maka família ne’ebé maka iha tempu difícil ajuda ita. Ezemplu ida maka tia Mariazinha ho tio Ikitu Osório Soares. Tanba ne’e iha ne’ebé de’it ita iha ha’u-nia agradesimentu wa’in ba ita favor tia Mariazinha ho tio Ikito Osorio Soares.

No ha’u-nia agradesimentu mós ba família sira hotu ne’ebé maka ajuda ha’u-nia família sira bele moris no bele sei moris. Polítika ita la hanesan mas ita ran de’it. Ran ida de’it ne’e maka halo ita respeita malu, tulun malu no salva malu. Bainhira ha’u hakerek hanesan ne’e família joven sira husi Liurai Manelima ladun hatene karik bele husu ba tio Ikito Osório Soares, tio Estêvão Soares ho tio Siku Soares. Tiu na’in tolu ne’e maka hatene barak liu kona-ba ha’u-nia pai ho ha’u-nia abo ho buat ne’ebé maka ha’u hakerek iha-ne’e. Tanba ha’u haree tiha ona katak dalabarak maluk joven sira ladun hatene kona-ba istória família sira nian iha passado, istória fetosan-umane ne’ebé maka iha. Ran ne’ebé maka ida. Husi beiala ne’ebé maka ida.


Ha’u hakerek hanesan ne’e lori hatudu de’it mós katak dalaruma iha istória passadu buat sira hanesan ne’e akontese. Mas buat ida passado ne’e hakerek de’it nu’udar lembransa ida atu ita hatene de'it. Importante liu maka ita relasaun familiar ne'ebé maka hatur ho lisan maka tenki kontinua metin. Ita bele iha diferensa hanoin iha parte seluk-seluk mas parte ida família ita sei hamutuk nafatin tanba ne'e iha relasaun hon ran ida de'it, feto nian nan nian ne'ebé maka hatur iha mama fatin ho lisan no uma lisan maka buat ida ita bolu fetosan-umane nian. Tanba ita hola malu ba malu de'it. La iha ida maka sai loos de'it fetosan ou umane de'it. Ita hotu sai fetosan ho umane dala ida de'it tanba hola malu ba malu hela.