Bainhira ema balu hanoin katak ha’u la hadomi ha’u-nia família
sira entaun ne’e la loos. Buat ida-ne’ebé ha’u bele hatudu maka ne’e durante
konflitu familiar ha’u sempre buka mantein situasaun paz nian. Buka sempre atu
hakalma situasaun. Respeitu malu. Bainhira iha ko’alia ne’ebé maka ladun di’ak ha’u
sempre fó-hanoin atu respeita ema.
Iha partidu mos ha’u hatudu tiha ona. Biar ami sempre diskuti malu
liu-liu iha eleisaun dahuluk lori forma Assembleia Konstituente ha’u sempre
defende Fretilin ba buat sira hanesan data proklamasaun, bandeira RDTL, Proklamador.
Ha’u-nia família UDT balu la gosta ha’u. Sira hanoin ha’u kontra sira. Mas
afinal lae. Ha’u sempre fiel no hadomi sira.
Bainhira ema kaer ha’u-nia
tiun xefe suku Funar iha governasaun dahuluk ha’u rona no ha’u deside husik
Fretilin nu’udar simpatizante ida. Ha’u lakoi atu rona ha’u-nia família UDT
sira balu (ha'u hanesan memperkirakan de'it. Ha'u la rona sira ko'alia hanesan ne'e ida. Ne'e hanesan perkiraan ha'u nian de'it) atu dehan “haree ba Hercus nonook de’it no nafatin iha Fretilin. Sira ne
hanesan ne’e. Ninia apa boot sira uluk maka kaer, futu no atu oho sira-nia tiun
rasik. Agora nia mos hanesan apoiu fali governu ida-ne’ebé haruka ema ba kaer
no futu ninia tiun rasik mos nia nafatin defende”. Liafuan hanesan ne’e maka ha’u
lakoi atu rona. Ha’u husik Fretilin nu’udar simpatizante ida.
Atu hatudu katak ha’u-nia
laran hamutuk ho ha’u-nia família UDT sira no atu halo sira sinte ha’u hadomi
sira ha’u simu pedidu lori tama UDT. Ha’u sinte (karik ha’u bele sala) fofoin ha’u
tama UDT ha’u-nia família UDT balu karik ha’u-nia primu sira balu la gosta ha’u
no nafatin deskonfia se ha’u sei nafatin simpatizante Fretilin karik. Mas ha’u
komprende primu sira ne’e sira-nia hanoin no deskonfiansa no ha’u nonook de’it.
Importante maka ha’u-nia laran moos. Sira deskonfia iha razaun tanba sira
hatene ha’u uluk. Mas ha’u hadomi no fiel ba sira.
Até ha'u iha Portugal ema balu akuza ha'u no la gosta ha'u tanba ha'u relasaun familiar ho maluk integrasionista no autonomista sira ha'u simu no nonook de'it. Ha'u nunka nega sira nu'udar ha'u-nia família. Ha'u nunka nega katak ha'u respeita sira. Ha'u simu mau olhado sira ne'e hotu. Tanba família nafatin família mezmu hanoin polítika la hanesan. Mas hadomi no fiel nafatin ba família sira.
Mai ha'u, iha tempu ukun rasin an ne'e, família importante iha ha’u-nia moris. Iha kazu ne’ebé afeta sira-nia moris ha’u
hamutuk ho sira. Se sira hakarak ha’u sai, ha’u sai. Se sira haruka ha’u nonook
ha’u nonook. Se sira dehan A ha’u mos dehan A. Iha situasaun difisil maka ita
bele hatudu loloos se ita hadomi malu ou lae. Se ita fiel ba malu ou lae. La
iha ema ne’ebé maka di’akliu ita-nia família rasik no ita-nia amigos fieis
sira.
Ha'u hadomi no fiel to’o mate ba sira iha ita-nia moris tomak. Ne’e maka
segredu moris nian.