Ha’u-nia reflesaun badak ba Páskoa 2013

Iha tempu Páskoa ne’e

Ha’u harohan ba Ita-Boot Kristu

Haraik mai atan ha’u kbiit perdaun nian hanesan Ita-Boot

Perdua ema hotu

Ne’ebé maka halo aat mai ha’u

Hanoin aat mai ha’u

Estraga ha’u

Defama ha’u

Odiu ha’u

Trai ha’u

Fila kotuk mai ha’u

Nega ha’u.

Perdua, perdua no perdua.

Tanba Ita-Boot rasik dehan sasukat ne’ebé ó uza sei uza fali lori sukat ó iha loron ida.

Tanba ne’e ha’u sei la bele balas ema nia aat sira hotu mai ha’u.

Perdaun importante tanba Ita-Boot mós dehan se ó perdua ó moos sei hetan perdaun.

Ita-Boot rasik mós perdua ema hotu ne’ebé haterus Ita-Boot no hedi Ita-Boot ba Krúz

Até iha Krúz leten molok Ita-Boot nia iis atu kotu Ita-Boot reza ba ema sira-ne’e lori dehan: Aman perdua sira ba tanba sira la hatene saída maka sira halo!”.

Tanba ne’e ha’u la iha razaun atu la perdua  ema hotu!

Se Ita-Boot ha’u-nia Maromak perdua ema halo aat Ita-Boot

Tanbasá ha’u lae?

Hanesan Ita-Boot ninia seguidor ha’u iha devér lori halo tuir hanesan Ita-Boot

Perdua hanesan Ita-Boot perdua

Perdua seim kondisaun.

Buat ne’ebé maka atan ha’u husu ba Ita-Boot Na’i

Maka haraik atan ha’u kbiit lori perdua

Tanba ha’u fraku liu Na’i

Ho Ita-Boot maka ha’u bele.

Nota: Ha'u-nia hakerek ne'e jerál bele reflete mós ba maluk sira balu sira-nia situasaun ou lae. Mas importante liu maka idak-idak reflete ba idak-idak ninia situasaun rasik. Tanba dalaruma ita-nia situasaun hanesan ho ema hotu ou dalaruma hanesan de'it ba ema lubun balu de'it ou dalaruma la hanesan liu.