Husi ne'ebé mata-been ne'e mai, Zélia?

Husi ne’ebé mata-been ne’e mai, Zélia?

Husi fuan ne’ebé kanek

Ou husi domin loos ida ne’ebé atu lakon.

Husi ne’ebé mata-been ne’e mai?

Husi saudades ba tempu ne’ebé ita lao hamutuk

Ou husi laran ne’ebé moras ba tempu diak sira ne’ebé ita la bele ona atu hetan.

Husi ne’ebé mata-been ne’e mai?

Husi destinu ne’ebé ha’u monu sala

Ou husi destinu ne’ebé ha’u obriga atu hetan.

Husi ne’ebé mata-been ne’e mai?

Husi domin ha’u nian ne’ebé ó fahe

Ou husi planu ne’ebé ó halo nanis ona ho ó-nia doben seluk.

Husi ne’ebé mata-been ne’e mai?

Husi ha’u-nia hanoin sala ó hadomi ha’u

Ou husi lasu ó nian ne’ebé ha’u monu.

Husi ne’ebé mata-been ne’e mai?

Husi ha’u-nia juramentu nu’udar laen fiel total ba ó

Ou husi laran tanis tanba ó iha laen seluk.

Husi ne’ebé mata-been ne’e mai?

Husi ha’u nia ki’ak ne’ebé la bele fo osan, riku soin no promosaun ba serbisu di’ak ba ó?

Ou husi laran dodok tanba mane seluk bele fó ó buat hotu ne’ebé ó hakarak.

Husi ne’ebé mata-been ne’e mai?

Husi ha’u-nia domin loos ba ó

Ou husi tristeza tanba iha kotuk ó halo tuir hela nafatin doben seluk nia hakarak.

Husi ne’ebé mata-been ne’e mai?

Husi tauk lakon ó

Ou husi ó-nia domin ne’ebé ha’u nunka hetan husi ó.

Husi ne’ebé mata-been ne’e mai?

Husi ó-nia nonook

Ou husi Maromak ne’ebé seidauk rona ha’u nia harohan.

Husi ne’ebé mata-been ne’e mai?

Husi ha’u-nia sorin mamuk no ha’u malirin toba mesak iha kalan

Ou husi ha’u-nia domin ne’ebé maka sempre iha ba ó iha ha’u-nia moris tomak.

Husi ne’ebé mata-been ne’e mai, Zélia?

Ha’u husu ba ó Zélia ha’u-nia fen

Husi ne’ebé mata-been ne’e mai?

Husi ha’u-nia hakarak atu ó sai de’it ha’u-nia fen ida ba ha’u-nia moris tomak

Ou husi ha’u-nia beran laek atu kaer metin ita rua nia kazamentu tan ha'u kuran rikusoin.

Husi ne’ebé mata-been ne’e mai?