Matan sira ne'e

I

Ha’u-nia isin nahe an iha duut matak no bee-matan malirin

Tau fiar ba matan moos no kmo’ok sira-ne’ebé kbiit ita la laran-rua

Ne’ebé santu no divinu

Misteriozu no ita la kompreende

Duke ba matan sira baibain ne’ebé haree ho ta’uk

Bosok teen,

Makerek,

No harahun.

Ha’u gosta matan sira ne’e

Moos

Kmo’ok

Matan sira ne’e sira-nia nabilan

Halakon kalohan metan ne’ebé taka sidade nia kmo’ok

Harahun fatuk metan sira hotu

Husik loriku sira atu semo ho liberdade

Hanorin atu ema boot sira hatudu responsabilidade

Hatudu dalan loos no di’ak ba labarik sira

Husik atu ita bele lee moris no aprende husi esperiénsia moris ne’e rasik duni

Atu sai tasak no forte hasoru anin fuik no laloran boot

Atu hamriik metin nafatin

No futu ita-nia isin no klamar besik matan moos no kmo’ok ne’e ninia na’in

Tanba matan moos no kmo’ok ne’e sira-nia na’in maka Na’i ne’ebé soi buat hotu

Haree no la haree Maka moris ida ne’e nia soin.

II

Matan

Ha’u gosta matan sira ne’e

Moos

Kmo’ok

Haree borus to’o klamar sira-nia kle’an

Matan sira ne’e haree dook liu husi realidade

Semo to’o lalehan ninia hun

Nani no luku iha hanoin sira hotu.

Iha kalan ne’ebé roman sai fraku

Iha esperansa ida-ne’ebé presiza manan

Iha misaun ida-ne’ebé imposivel

Iha destinu ida-ne’ebé tenke hasoru

Iha matan sira-ne’ebé moos no kmo’ok

Sempre tau matan iha moris ida-ne’e

Hercus Santos
14 February 2006