Timor ita rain

Ha’u sei hananu
Ba foho sira
Fatuk inan no fatuk oan
Ba balada sira
Ba rai kutun sira
Matebian sira
Mate-klamar sira
Ba uma fukun hotu-hotu
Katak rai Timor
Rai ita nian.

Hananu hamutuk ho manu fuik sira-nia lian
Hamutuk ho tarutu be turuturuk sira
Ho lian babadok
Ho labarik sira-nia hamnasa
Katak rai Timor
Rai ita nian.

Loriku sei hananu
Asu sira sei hatenu
Atu fó hatene
Katak rai Timor
Rai ita nian.