Ohin ha'u hakarak sai

Lao ba fatin ruma, importante maka ha'u sai husi  ne'e

Ha'u lakoi hela de'it iha rezidénsia nia laran ne'ebé maka badin loos

Ha'u presiza sai hola netik ar foun ruma iha dalan-dalan sira ne'ebá

Ha'u presiza hola netik inspirasaun ruma husi natureza nia kmo'ok

Tanba ha'u presiza hanoin foun

Ha'u presiza hakat foun

Ha'u presiza define hikas ha'u-nia moris

Ha'u presiza buka atu hatene loos ha'u-nia hakarak ne'e saida loos iha moris ida-ne'e

Ha'u hatene katak agora daudaun ha'u iha-ne'e

Ha'u iha Portugal maibé ha'u iha-ne'e lori halo saida loos?

Ha'u iha-ne'e tanbasá?

Ha'u iha-ne'e to'o bainhira?

Bainhira ha'u fila husi-ne'e ha'u sei lori buat ruma ne'ebé maka ha'u hakarak ka lae?

Ou katak ha'u sei hetan duni buat ruma di'ak ba ha'u-nia moris, ba ha'u-nia familia no ba ema seluk?

Depois bainhira ha'u iha-ne'e atu bá ne'ebé?

Ha'u iha pergunta barak tebes ne'ebé mosu iha ha'u-nia hanoin

Ha'u iha laran tauk lori haree ba futuru

Ou sekarik ha'u halo pergunta badak ida ha'u sei halo hanesan ho pergunta ema filósofu sira halo beibeik ona.

Pergunta hanesan iha moris ne'e ha'u mai husi ne'ebé, ha'u halo saida no ha'u ba ne'ebé?

Pergunta hirak ne'e difisil atu hatan, difisil atu fó resposta ida-ne'ebé maka bele halo ha'u-nia laran satisfeitu Maibé tuir loloos pergunta hirak ne'e maka ha'u presiza atu hatan. Agora hatan oinsá? ida-ne'e maka ha'u presiza atu buka hatene. Tanba ne'e buat ne'ebé maka ha'u presiza atu halo ohin loron nian maka reza, reflete, tetu buat hotu-hotu lori foti desizaun ida, lori foti dalan ida. Desizaun ou dalan ida-ne'ebé maka bele lori ksolok mai ha'u nia isin no klamar. Ha'u presiza hatene diadi'ak saida loos maka ha'u tenki halo agora tanba ne'e maka ha'u presiza hatene ha'u ne'e sé? Atu hatene ha'u ne'e sé maka ha'u presiza hatene ha'u ne'e mai husi ne'ebé ou katak hatene ha'u-nia passadu. Bainhira hatene ha'u-nia passadu maka ha'u bele hatene ha'u ne'e sé? Ho hatene ona ha'u ne'e sé? maka ha'u bele hatene ona define moris ohin loron nian no se ha'u konsege difine moris ohin loron nian entaun ha'u mos sei konsege define moris aban bainrua nian.

A foto retirada de http://malucoporjesus.wordpress.com/